არნო ხიდირბეგიშვილი: “უკრაინის ორად გახლეჩის შემდეგ სააკაშვილი თბილისში დაბრუნდება და “ევრომაიდან 2”-ს მოაწყობს, რის შემდეგაც საქართველო სამცხე-ჯავახეთს, სამეგრელოს, ქვემო ქართლსა და აჭარას დაკარგავს!”
როდესაც ოლიგარქები პოლიტიკაში მოდიან და საკუთარ ბექგრაუნდს ივიწყებენ (ანუ იმას, რომ ოლიგარქები არიან), ისინი ცუდად ამთავრებენ – როგორც ტიმოშენკო და ხოდორკოვსკი, ან ძალიან ცუდად – როგორც პატარკაციშვილი და ბერეზოვსკი. ივანიშვილმა ეს იცის, ამიტომაც წავიდა პოლიტიკიდან ერთი წლის შემდეგ. სამაგიეროდ, არ იცის იანუკოვიჩმა, რომელმაც ხელისუფლებაში მოიყვანა ნეოფაშისტები კლიჩკო-იაცენიუკი-ტიაგნიბოკი, როგორც შევარდნაძემ – ნაციონალები სააკაშვილი-ჟვანია-ბურჯანაძე.
ოლიგარქმა იანუკოვიჩმა ძირში არ აღკვეთა სისხლიანი პუტჩი – არ გამოაცხადა საგანგებო მდგომარეობა 2013 წლის ნოემბერში, რათა საფრთხე არ შეექმნა “ობშჩაგის” – უკრაინელი ოლიგარქების კაპიტალისთვის. ასევე მოიქცა შევარდნაძე 2003 წელს, რათა დარტყმის ქვეშ არ დაეყენებინა თავისი ოჯახისა და კლანის კაპიტალი. ამიტომ უკრაინაში ნეოფაშისტების ხელით დაღუპულთა სისხლი, ისევე როგორც ნაციონალ-სააკაშისტების მმართველობის 9 წლის განმავლობაში საქართველოში დაღუპულთა სისხლი იანუკოვიჩის და შევარდნაძის კისერზეა, რომლებმაც მათთვის ხალხის მიერ მიცემული მანდატი არ აამოქმედეს!უკრაინა 2014 წელს თავის ტერიტორიებს დაკარგავს, როგორც საქართველომ დაკარგა შევარდნაძე-სააკაშვილის მმართველობის დროს. უკრაინას სისხლით გახლეჩენ ორად – დასავლეთ და აღმოსავლეთ უკრაინად, ისევე როგორც საქართველოს სისხლით მოაგლიჯეს აფხაზეთი და სამხრეთ ოსეთი შევარდნაძემ და სააკაშვილმა 1992 და 2008 წლებში. დასავლეთ უკრაინას ნატოში და ევროკავშირში მიიღებენ, ისევე როგორც საქართველოს – აფხაზეთისა და სამხრეთ ოსეთის გარეშე, ასევე სამცხე-ჯავახეთის, ქვემო ქართლისა და სამეგრელოს გარეშე. დიახ, უკრაინის ორად გახლეჩის და ამით პუტინისთვის სამაგიეროს გადახდის შემდეგ თბილიში ნიუ-იორკიდან სააკაშვილი დაბრუნდება, მერაბიშვილს ციხიდან გამოუშვებს და აქ “ევრომაიდან 2”-ს მოაწყობს, რის შემდეგაც საქართველოს დაქუცმაცება გაგრძელდება. ზემოთ ჩამოთვლილი რეგიონების გარდა საქართველოს აჭარაც მოწყდება, რომელიც თურქეთს გადაეცემა.
საქინფორმის მთავარი რედაქტორი და გენერალური დირექტორი
არნო ხიდირბეგიშვილი
20.02.2014
საქართველო, თბილისი
 |