არნო ხიდირბეგიშვილი: ბორტნიკოვის ინფორმაცია საშუალებას გვაძლევს განვსაზღვროთ კომპლექსური საფრთხეების ხასიათი

  2025 წლის 16 ოქტომბერს, ხუთშაბათს, რუსეთის ფედერალური უსაფრთხოების სამსახურის დირექტორმა, დსთ-ს წევრი-მონაწილე სახელმწიფოების უსაფრთხოების ორგანოებისა და სპეციალური სამსახურების ხელმძღვანელთა საბჭოს თავმჯდომარემ, არმიის გენერალმა ალექსანდრე ბორტნიკოვმა, სამარყანდში (უზბეკეთი) გამართულ დსთ-ს 57-ე სხდომაზე 20-წუთიან გამოსვლაში რიგი საგანგაშო განცხადებები გააკეთა, რაც საშუალებას გვაძლევს ვივარაუდოთ, რომ საქართველო ტერორიზმის რისკის ქვეშ იმყოფება, თუმცა ФСБ-ს დირექტორს ის ერთხელაც არ უხსენებია.

   დიდი გულუბრყვილობაა იმის დაჯერება, რომ ევროპული ელიტები, რომლებსაც პრემიერი კობახიძე „ევროპული ბიუროკრატია“ უწოდა – დიდი ბრიტანეთის, გერმანიის, საფრანგეთის, ესტონეთის, ლიტვის, ლატვიის, ფინეთის, ისლანდიის, ნიდერლანდების, დანიის, შვედეთის, ნორვეგიის, კანადისა და ევროკავშირის ხელისუფლებები, რომლებიც აგრძელებენ საქართველოს ხელისუფლების კრიტიკას (მიუხედავად იმისა, რომ საქართველოს ევროინტეგრაციის პროცესი 2028 წლამდე შეჩერებულია), დაკმაყოფილდა მოცემულობით, რომ საქართველოში რევოლუციური სცენარი ჩაიშალა. ახლა ისინი, სავარაუდოდ, ტერორისტული სცენარის ამოქმედებას აპირებენ, რაც იმას ნიშნავს, რომ საქართველო დღეს გაცილებით დიდ საფრთხეშია, ვიდრე 2025 წლის 4 ოქტომბერს იყო. ანუ, ვერბალური მეთოდების გარდა – ევროსტრუქტურების ხელმძღვანელების, ევროდიპლომატებისა და ევროპარლამენტარების მხრიდან „ქართული ოცნების“ ხელისუფლების დაგმობის გარდა, რითიც გასულ კვირას გამოირჩეოდნენ კაია კალასი, მარტა კოსი, რასა იუკნევიჩიენე, მარია თელალიანი, ანიტა ჰიპერი და ელინა ვალტონენი, ნატოს წამყვანი ქვეყნების სპეცსამსახურებმა, ბრიტანეთის MI6-ისა და SAS-ის მეთაურობით, შესაძლოა, საქართველოს წინააღმდეგ ჰიბრიდული ომის სამხედრო და არასამხედრო მეთოდები გამოიყენონ როგორც ეს რუსეთის წინააღმდეგ გააკეთეს (რაზეც ალექსანდრე ბორტნიკოვმა თავის გამოსვლაში განაცხადა).

   მაინც რა დაუწუნა პატარა საქართველოს მრავალგენდერულმა ევროპამ – ინკვიზიციის, კოლონიალიზმის, ფაშიზმის, ანტისემიტიზმის, იუვენალური იუსტიციის, ლგბტ–ს, ერთსქესიანთა ქორწინების, ევთანაზიისა და გილიოტინის სამშობლომ, სადაც დღეს ახალშობილებში ყველაზე გავრცელებული სახელი „მუჰამედია“?

• ის, რომ ყოვლადწმიდა ღვთისმშობლის წილხვედრ საქართველოში სახელმწიფო რელიგია მართლმადიდებლობაა – ისევე როგორც რუსეთში?

• ის, რომ საქართველომ მიიღო კანონები, რომლებიც კრძალავს ჰომოსექსუალიზმის პროპაგანდას და სახელმწიფო გადატრიალებების მიზნით უცხოეთის აგენტების დაფინანსებას?

• ის, რომ საქართველომ უარი თქვა რუსეთის წინააღმდეგ ომზე, ხოლო ევროკავშირი დაინტერესებულია ომის გაგრძელებით, რადგან ევროკავშირის გადაიარაღებისა და უკრაინის დახმარებისთვის 800 მილიონი ევროა გამოყოფილი – ევროკავშირის 2026 წლის სამხედრო ბიუჯეტი, რომლის ლომის წილის დასაკუთრებაც დიდ ბრიტანეთს სურს?

• ის, რომ ევროკავშირის ეკონომიკის წილი მსოფლიოში, ანტირუსული სანქციებისა და რუსეთის ენერგორესურსებზე უარის თქმის გამო, 2008 წლის 30%-დან წელს 17.5%-მდე შემცირდა, ხოლო ოფიციალურმა თბილისმა უარი თქვა შეერთებოდა რუსეთის წინააღმდეგ ეკონომიკურ სანქციებს?

• ის, რომ საქართველოს აქვს მაღალი ხარისხის სასმელი წყლის უზარმაზარი მარაგი, რომლის მწვავე დეფიციტია ევროპაში, განსაკუთრებით – დიდ ბრიტანეთში, რომ აღარაფერი ვთქვათ მანგანუმსა და ნაყოფიერი ქართული მიწის სხვა წიაღისეულ სიმდიდრეებზე?

• ის, რომ საქართველო წარმოადგენს სტრატეგიულ სატრანსპორტო და ენერგეტიკულ სატრანზიტო დერეფანს, რომელზეც გადის „ბაქო-თბილისი-ჯეიჰანის“ მილსადენი, რომელიც ბრიტანული ტრანსნაციონალური ნავთობისა და გაზის კომპანია „BP“-ს ეკუთვნის და რომელიც ევროპას კასპიის ნახშირწყალბადებს აწვდის? ასევე გადის საერთაშორისო ლოგისტიკური მარშრუტი „შუა გზა“, რომელიც ჩინეთსა და აზიას ევროპასთან აკავშირებს და ჩინეთის ინიციატივის „სარტყელი და გზა“ ნაწილია, შესაბამისად, საქართველოში „უნდა იყოს“ ლონდონისა და ბრიუსელის მიერ კონტროლირებადი მარიონეტული მთავრობა?

• ის, რომ შავი ზღვისპირა საქართველოს რუსეთთან სახმელეთო და საზღვაო საზღვარი აქვს, რაც ნატოს პოტენციურ პლაცდარმად და ლოგისტიკურ ტერიტორიად აქცევს, ასევე ესაზღვრება თურქეთს, კასპიისპირა აზერბაიჯანსა და სომხეთს, რომელიც ირანს ესაზღვრება?

2016 წელს გამოვაქვეყნე ორი ანალიტიკური წერილი: „საქართველოში მილიონობით ფუნტი სტერლინგის შემოსვლის შესახებ“ და „დიდი ბრიტანეთი ჩაანაცვლებს შეერთებულ შტატებს კავკასიაში – CSSF გეგმები საქართველოში, სომხეთსა და აზერბაიჯანში “. ორივემ არ დაკარგა აქტუალობა, რადგან ტრამპის „მეორედ მოსვლის“ შემდეგ (რომელმაც გააუქმა USAID) საქართველოში უცხოური გავლენის აგენტებს ახალი მთავარი სპონსორი გამოუჩნდათ: გაერთიანებული სამეფო, საქართველოში ყველაზე დიდი ინვესტორი, რომელიც მხოლოდ საბანკო სექტორსა და უძრავ ქონებაში დებს ინვესტიციებს. არადა, 2025 წლის 16 ოქტომბერს, რუსეთის ФСБ-ს დირექტორმა ალექსანდრე ბორტნიკოვმა ზემოხსენებულ გამოსვლაში განაცხადა, რომ „ევროპამ, შეერთებული შტატების ნაცვლად, დაიწყო დსთ–ს ქვეყნებში არასამთავრობო ორგანიზაციების დაფინანსება, რომლებიც ტრადიციული კავშირების განადგურებას ისახავს მიზნად“.

   განვიხილოთ რუსეთის ФСБ-ის დირექტორის გამოსვლიდან რამდენიმე ამონარიდი – ინფორმაცია, რომელიც შესაძლოა პირდაპირ კავშირში იყოს საქართველოსთან, თუმცა ყველაფერი, რაც ალექსანდრე ბორტნიკოვმა თქვა, ირიბად ეხება საქართველოს.

კერძოდ, ФСБ-ის დირექტორმა თავის კოლეგებს აცნობა MI6-ის ხელმძღვანელობის მოწოდებების შესახებ, რომ „პარტიზანული ომის ფარგლებში დაეხოცათ ყველა არასასურველი პირი რუსეთში“. ამას გარდა, რომ ბრიტანეთის მთავარი სადაზვერვო სპეცსამსახური არ ერიდება ისეთი მეთოდების გამოყენებას, როგორიცაა „არასასურველი პირების მკვლელობა“, და იმის გათვალისწინებით, რომ ლონდონმა განზრახ მოახდინა მოსახლეობის ყველაზე დაუცველი ფენების, მათ შორის მიგრანტები, „არასასურველი პირების“ კატეგორიაში, ძნელი მისახვედრი არ არის, რომ რუსეთში ათასობით ქართველი მიგრანტი საფრთხეშია.

„ბრიტანელების საყვარელი ტაქტიკა – ხალხების ერთმანეთის წინააღმდეგ რელიგიურ და ეროვნულ ნიადაგზე დაპირისპირება – გამოიყენება ცენტრალური აზიისა და ამიერკავკასიის მოქალაქეების წინააღმდეგ“, – განმარტავს ბორტნიკოვი და ეს ნიშნავს, რომ ეთნიკური ქართველების შესაძლო მკვლელობები რუსებს დაბრალდება და ამას თბილისში რადიკალური ოპოზიცია გამოიყენებს „ქართული ოცნების“ „პრორუსული ხელისფლების“ დასამხობად.

მსგავსი პროვოკაციული პრეცედენტები უკვე მოხდა რუსეთში ცენტრალური აზიის რესპუბლიკებიდან ჩამოსული გასტარბაიტერების მიმართ. იმის გათვალისწინებით, რომ ბრიტანეთის და უკრაინის დაზვერვები ერთად მუშაობენ, შესაძლებელია, რომ რუსებსა და აზერბაიჯანელებს შორის ბოლოდროინდელი დაძაბულობა, ვინც არ უნდა ყოფილიყვნენ ისინი – კრიმინალები თუ ჟურნალისტები, განზრახ იყო პროვოცირებული ბრიტანული და უკრაინული დაზვერვების მიერ ევროპული ელიტების დავალებით. ხოლო სამხრეთ კავკასიის ხალხებისთვის – სომხებისა და აზერბაიჯანელებისთვის, ქართველებისთვის, აფხაზებისა და ოსებისთვის – არ არის საჭირო იმის ახსნა, თუ რა საფრთხეს წარმოადგენს „ხალხების ერთმანეთის წინააღმდეგ რელიგიურ და ეროვნულ ნიადაგზე დაპირისპირება“ – რაც ბრიტანელების მეორე საყვარელი მეთოდია „არასასურველ პირთა მკვლელობებთან ერთად“.

„მოზარდები, პენსიონერები და სხვა ფინანსურად დამოკიდებული პირები ტერაქტებში ჩაითრევიან უკრაინის უსაფრთხოების სამსახურის ზედამხედველობის ქვეშ მყოფი ქოლ–ცენტრების მიერ განხორციელებული თაღლითური ოპერაციების მეშვეობითა და უკრაინის სამხედრო ძალების საინფორმაციო–ფსიქოლოგიური ოპერაციების ქვედანაყოფების მიერ. მხოლოდ უკრაინაში ასეთი ქოლ–ცენტრი 120-ზე მეტია“, – იუწყება ბორტნიკოვი და უმალ მახსენდება ლონდონში თავშეფარებული საერთაშორისო ძებნაში გამოცხადებული დავით კეზერაშვილის თაღლითური ოპერაციები – ქოლ-ცენტრების ქსელის ხელმძღვანელის, რომლისგანაც 50 ქვეყანაში 100 000 პენსიონერი დაზარალდა, რასაც კეზერაშვილისთვის დღეში მილიონი დოლარი მოჰქონდა.

ბორტნიკოვი: „ისრაელის მხრიდან სამხედრო ესკალაციის შემდეგ, ფიქსირდება ჯიჰადისტური იდეოლოგიის პროპაგანდისტი ქსელური საზოგადოებების რაოდენობის რამდენჯერმე ზრდა, ასევე ჩვენი ქვეყნების მოქალაქეების რიცხოვნობის ზრდა, რომლებიც აპირებენ ახლო აღმოსავლეთში გამგზავრებას ტერორისტულ ფორმირებებში გაწევრების მიზნით… ასეთი პირების სირიის ტერიტორიაზე თურქეთისა და სპარსეთის ყურის ქვეყნების გავლით გადაადგილების არხებს უცხოური სადაზვერვო სამსახურები აკონტროლებენ. მათი ამოცანები მოიცავს კანდიდატების შერჩევას გადასაბირებლად და მათ გადამისამართებას ტერორისტული თავდასხმების განსახორციელებლად მათი წარმოშობის ქვეყნებში“ ანუ, საქართველოში დავერბოვკებულ დაქირავებული მოხალისეებს თურქეთის გავლით ჯერ ახლო აღმოსავლეთში გადაისვრიან, ხოლო „ისლამური სახელმწიფოს“ რიგებში საბრძოლო უნარების მიღების მერე ისევ საქართველოში დააბრუნებენ ტერაქტების განსახორციებლად.

ბორტნიკოვი: „ბრიტანეთის და უკრაინის სადაზვერვო სააგენტოები თავიანთ ძალისხმევას რადიკალური ისლამის მხარდამჭერების მოძებნასა და გადაბირებაზე ხარჯავენ, იმ პირთა ჩათვლით, ვინც ახლო აღმოსავლეთში ITO-ს შემადგენლობაში იბრძოდა“ (ITO – საერთაშორისო ტერორისტული ორგანიზაცია, მაგალითად, „ალ–ქაიდა“, „ჯაბჰათ ალ– ნუსრა“ და ა.შ., მაგრამ უმეტეს შემთხვევაში, რომლებზეც საუბარია და რომლებიც დაკავშირებულია საქართველოსთან, ესაა ISIS, დღეს უკვე ISKH – ისლამური სახელმწიფო „ხორასანის ვილაიეთი“). თუ ვინმეს დაავიწყდა სააკაშვილის რეჟიმის ტერორისტებთან კავშირები: ინტერნეტში მოიძებნება არაერთი ჩემი პუბლიკაციაა პანკისის ხეობის შესახებ, სადაც „ქართველი“ ჩეჩნები – ქისტები კომპაქტურად სახლობენ, სადაც ჩეჩენი ბოევიკების ბანაკები და „ისლამურ სახელმწიფოში“ მოხალისეების გადასაბირებელი პუნქტები იყო გახსნილი; როგორ უჭერდნენ მხარს პანკისის ხეობაში დაბანაკებულ იატაკქვეშა ტერორისტებს ევროპიდან და პირადად ახმედ ზაკაევი; როგორი გამჭვირვალე იყო საქართველოს საზღვარი ჩეჩნეთის რესპუბლიკასთან რუსეთთან ჩეჩნეთის ომების დროს – და სანამ „ქართული ოცნება“ მოვიდოდა ხელისუფლებაში; როგორ სურდა პრეზიდენტ შევარდნაძეს რუსლან გილაევის რაზმის მეშვეობით აფხაზეთის დაბრუნება, შემდეგ კი მერაბიშვილმა, პრეზიდენტ სააკაშვილის დავალებით, შექმნა შინაგან საქმეთა სამინისტროში განყოფილება ჩეჩნებთან, ინგუშებთან, დაღესტნელებსა და ჩერქეზებთან სამუშაოდ, შეაიარაღა ისინი, მოწმობები დაურიგა, შექმნა მათი „საგმირონი საქმეების“ გასაშუქებლად ტელეკომპანია „ПИK“ („პირველი საინფორმაციო კავკასიური“), სადაც სამუშაოდ ჯოხარ დუდაევის ქვრივი მიიწვიეს; მაგრამ სულ ბოლოს სააკაშვილმა, იმის შიშით, რომ მოსკოვი მას საქართველოდან ამერიკაში გაქცევას ხელს შეუშლის, „ФСБ“-სთან ქულები ჩაიწერა და ჩრდილოკავკასიელებს უღალატა – დუკვახ ჯოშუევის რაზმი გაანადგურა ლაფანყურის ოპერაციის დროს, ხოლო ISIS-ის ერთ-ერთმა ცნობილმა მეთაურმა და ლიდერმა, ახმად ჩატაევმა (შიშანი), თავი ყუმბარით აიფეთქა თბილისში, ბერი გაბრიელ სალოსის ქუჩაზე ჩატარებული სპეცოპერაციის დროს უკვე „ქართული ოცნების“ ხელისუფლების დროს; რამდენი ცნობილი საველე მეთაური იყო წარმოშობით საქართველოდან, საკმარისია თარხან ბათირაშვილის (აბუ უმარ ალ-შიშანი ) და ცეზარ ტოხოსაშვილის (ალ ბარა შიშანი) დასახელება.

რაც შეეხება თურქეთის გავლით საქართველოში დაქირავებული მოხალისეების წვრთნასა და გადასროლას: საქინფორმა 2013 წლის თებერვალში გამოაქვეყნა საიდუმლო დოკუმენტი, რომელიც ადასტურებდა, რომ თურქეთის ეროვნული დაზვერვის სამსახური და შინაგან საქმეთა სამინისტრო 2013 წლის თებერვლიდან წვრთნიდნენ და აგზავნიდნენ სირიაში მოხალისეებს საქართველოდან, ორგანიზებას უწევდნენ ISIS-ის რიგებში მებრძოლი მოჯაჰედების თურქეთის ტერიტორიის გავლით ტრანსპორტირების პროცესს.

და აი – ყურადღება! – გასულ კვირას, 2025 წლის 13 ოქტომბერს, საქართველოს სახელმწიფო უსაფრთხოების სამსახურის კონტრტერორისტულმა ცენტრმა დააკავა საქართველოს სამი მოქალაქე „უცხოურ ტერორისტულ ორგანიზაციაში გაწევრებისა და ტერორისტული საქმიანობის ხელშეწყობის“ ფაქტის გამოძიების ფარგლებში. ე.წ. „ტაკბირისტების ჯამაათის“ წევრები, რომელიც ტერორისტული იდეოლოგიის საფუძველზე ჩამოყალიბდა, ისინი კონტაქტს ინარჩუნებდნენ ზემოაღნიშნული მთავარი ტერორისტული ორგანიზაციის, „ისლამური სახელმწიფოს“ გავლენიან ლიდერებთან. მათი მითითებების შესაბამისად და მომავალი ტერაქტების განხორციელების მიზნით, მათ შექმნეს რადიკალურ ექსტრემისტულ იდეოლოგიაზე დაფუძნებული ჯგუფი. საქართველოს სახელმწიფო უსაფრთხოების სამსახურის ცნობით, „ზემოაღნიშნული ჯგუფის წევრები გეგმავდნენ „ისლამური სახელმწიფოს“ გავლენიანი წევრების უკანონოდ შემოყვანას საქართველოში და მათი ხელმძღვანელობით პლაცდარმის მოწყობას, რითაც უზრუნველყოფდნენ თანამოაზრეთა უკანონო მიღებას და განთავსებას, ლოგისტიკური მომსახურების გაწევას და ქვეყნის ტერიტორიის ტერორისტული მიზნებისთვის ტრანზიტულ გამოყენებას“. საგამოძიებო მოქმედებების მიმდინარეობისას ამოიღეს ტერორისტული ორგანიზაციის სიმბოლოების შემცველი ნივთები, ასაფეთქებელი ნივთიერებები, დიდი რაოდენობით საბრძოლო მასალა და ცეცხლსასროლი იარაღი, სამხედრო ტექნიკა, მობილური ტელეფონები და სხვა ელექტრონული შენახვის მოწყობილობები, ასევე დიდი რაოდენობით ნაღდი ფული სხვადასხვა ვალუტაში (საქართველომ უწინაც რამდენჯერმე ჩაატარა რეზონანსული სპეცოპერაციები „ისლამურ სახელმწიფოსთან“ თანამშრომლობაში ბრალდებული მოქალაქეების დასაკავებლად).

   დარწმუნებული ვარ, სუს–ი და მისი ახალი ხელმძღვანელი მამუკა მდინარაძე დაადგენენ ამ ტერორისტების კავშირებს საქართველოში, მათ შორის – რადიკალურ ოპოზიციასთან და დანარჩენ უცხოეთის აგენტებთან, თუ ეს კავშირები, რა თქმა უნდა, არსებობს, როგორც სააკაშვილის რეჟიმის დროს.

აქ სხვა კომენტარს ვერ გავაკეთებ, გარდა იმისა, რომ პანკისის მკვიდრი მალხაზ მაჩალიკაშვილი, რომელიც თავისი შვილის გამო „ქართული ოცნების“ მთავრობაზე შურისძიებაზე ოცნებობს, ყოველთვის რადიკალური ქართული ოპოზიციის ავანგარდშია.

   „ტერორიზმთან ბრძოლის ფარგლებში, უზბეკეთში, ყაზახეთსა და რუსეთში მოქმედი ITO-ს რამდენიმე უჯრედი განეიტრალდა. 60-ზე მეტი ტერორისტი დაკავებულია. საზღვრისპირა ნარკოდანაშაულთან ბრძოლის ოპერატიული და საგამოძიებო ღონისძიებების დროს, ბელარუსის, უზბეკეთისა და ყაზახეთის კოლეგებთან ერთად, დიდი რაოდენობით ნარკოტიკული საშუალება ამოიღეს, მათ შორის ისეთი, რომელიც აქამდე თანამეგობრობის ქვეყნებში არ იყო აღმოჩენილი“, – განაცხადა ФСБ-ს დირექტორმა. საქართველოში კი, მიმდინარე წლის ივნისიდან, გელა გელაძის შინაგან საქმეთა მინისტრად დანიშვნის შემდეგ, დააკავეს ასობით ნარკოდილერი საქონლით და ამოიღეს ასობით კილოგრამი ნარკოტიკი აზერბაიჯანიდან საქართველოში შემოსული ტრაილერებიდან.

დასასრულ, არ შემიძლია არ აღვნიშნო ФСБ-ის დირექტორის გამოსვლიდან კიდევ ერთი ციტატა, რომელიც პირდაპირ საქართველოს ეხება. „ნატოს გაფართოების გეგმა, რომლის პირდაპირი შედეგიც უკრაინის კრიზისი იყო, არ გაყინულა. ის გრძელდება სხვა პოსტსაბჭოთა სახელმწიფოებთან მიმართებაში არმიისა და სამხედრო ინფრასტრუქტურის მოდერნიზაციის, სადაზვერვო და სამართალდამცავი ორგანოების ტექნიკური აღჭურვისა და სპეციალისტების მომზადების სხვადასხვა დახმარების პროექტების საფარქვეშ“, – აღნიშნა ალექსანდრე ბორტნიკოვმა. მიუხედავად იმისა, რომ საქართველოს ნატოში წევრობაზე უარი ეთქვა, კონსტიტუციის 78-ე მუხლი, რომელიც განსაზღვრავს საქართველოს ნატოში გაწევრებისკენ ურყევ მისწრაფებას, ჯერ კიდევ არ გაუქმებულა. საქართველოს ატყუებენ ერთობლივი კომისიებით, სამეთაურო–საშტაბო წვრთნებითა და ტრენინგებით – იმის იმედით, რომ „ქართული ოცნების“ ხელისუფლებას, რომელიც რუსეთთან ომზე უარს ამბობს, ბოლოს და ბოლოს დაამხობენ.

   არნო ხიდირბეგიშვილი,
ქართული საინფორმაციო-ანალიტიკური სააგენტო „საქინფორმის“ გენერალური დირექტორი და მთავარი რედაქტორი, უშიშროების, სტრატეგიული ანალიზისა და საინფორმაციო პოლიტიკის ცენტრის დირექტორი

2025 წლის 20 ოქტომბერი
საქართველო, თბილისი