საქინფორმის ფოტორეპორტაჟი: „დიდი ზომები და დიდი ზომბები – „თავისუფალ ზონასთან“, პოლიციის მიერ მიღებული ზომების გამო, აქციამ განსაკუთრებული ექსცესების გარეშე ჩაიარა

საქართველო, 3 ოქტომბერი, საქინფორმი. გუშინ, თბილისში, პეკინის ქ. №34-ში საქართველოს ექსმმართველი პარტია „სააკაშვილის ნაციონალური მოძრაობის“ ახალგაზრდული რაზმის – „თავისუფალი ზონის“ ოფისთან საპროტესტო აქცია გაიმართა, რომელიც საათზე მეტხანს გაგრძელდა. მიტინგში მონაწილეობდნენ არასამთავრობო ორგანიზაცია „თავისუფალი თაობის“ წევრები, ყოფილი პოლიტპატიმრები, სტუდენტები, გაზეთი „ასავალ-დასავალის“ ჟურნალისტები, ასევე, საქართველოში ცნობილი სახეები – საზოგადო მოღვაწეეები, პოლიტიკოსები, კულტურის მოღვაწენი, ქართული არმიისა და ძალოვანი სტრუქტურების ვეტერანები.

 „მკვლელებო! ჯალათებო! ქათმებო!“ – უყვიროდნენ საპროტესტო აქციის მონაწილენი, ცოცხებისა და წყლით დიდ ზომებამდე გაბერილი პრეზერვატივების ქნევით, კედლებთან მდგარ „ზონის“ წევრებს. „პუტინის მონებო! მიშა მაგარია! გაუმარჯოს ბაჩოს!“ – დაზომბებულებივით ყვიროდნენ პასუხად ისინი, საქართველოსა და ევროკავშირის დროშების ფრიალით, და რფ-ის პრეზიდენტის მისამართით უცენზურო სიტყვებს ურთავდნენ.

თუ სათვალავში არ მივიღებთ კვერცხებს, რომლებსაც ორივე მხრიდან ისროდნენ და ამისათვის დაკავებულ „თავისუფალი თაობის“ ერთ-ერთ აქტივისტს, ღონისძიებამ განსაკუთრებული ექსცესების გარეშე ჩაიარა – მისი ორგანიზატორებისა და, უფრო მეტად, პოლიციელების ორმაგი კორდონის წყალობით, რომელიც მხარეებს აუღებელ კედლად ჰყოფდა. წესრიგის დამცველები ხომ აქციაზე ერთად აღებულ ყველა სხვა დანარჩენზე სამჯერ მეტი იყვნენ!