საქართველოს ხელისუფლებამ არ შეიგრძნო მსოფლიო პოლიტიკის ახალი ტრენდი - აშშ-ის პრეზიდენტად არჩეული მილიარდერი დონალდ ტრამპი, რომელმაც განაცხადა, რომ ამერიკამ პუტინის რუსეთთან უნდა იმეგობროს და თავი დაანებოს ომობანას ნატოს ძალების შემადგენლობაში და სხვა ქვეყნებში „ფერადი რევოლუციების“ მოწყობას; რომ აშშ-ის სახელმწიფო მდივნად ბიზნესმენი ტრამპი უმსხვილესი ამერიკული ნავთობკომპანია ExxonMobil-ის ხელმძღვანელი რექს ტილერსონი დანიშნა, რომელსაც ამერიკაში პუტინის მეგობარს უძახიან - ვლადიმერ პუტინმა ის  „მეგობრობის ორდენით“ დააჯილდოვა რუსეთთან დიდი ხნის ნაყოფიერი ბიზნესპარტნიორობისათვის (ეს სწორედ ის ორდენია, რომლითაც პუტინმა ბუბა კიკაბიძე დააჯილდოვა, მაგრამ მიმინომ ის რუსეთის მაშინდელ პრემიერს უკან მიუგდო!);რომ ევროპაშიც იმარჯვებენ ლიდერები, რომლებსაც რუსეთთან მეგობრობა სურთ; და რომ ანგელა მერკელმაც, საქართველოს ხელისუფლებისგან განსხვავებით, მსოფლიო პოლიტიკის ახალი ტრენდი შეიგრძნო - ისევ რუსეთთან აუცილებელ პარტნიორობაზე და გერმანიის ნატოსგან დისტანცირებაზე ალაპარაკდა.   
საქართველოს ხელისუფლება კვლავაც ძველ „დამშრალ კალაპოტში“ ზის და იმეორებს, რომ საქართველოს ევროატლანტიკური კურსი არასდროს შეიცვლება, ეს კი იმას ნიშნავს, რომ საქართველო არასდროს დაბრუნდება აფხაზეთსა და სამაჩაბლოში. უალტერნატივო ევროატლანტიკური კურსის გამოცხადება აფხაზეთისა და სამაჩაბლოს დაკარგვის აღიარების ტოლფასია!
 საქართველოს პატრიარქმა თავისი სულიერი ძმის - სრულიად რუსეთის პატრიარქისაგან გარანტია მიიღო, რომ რუსეთის მართლმადიდებელი ეკლესია ცნობს საქართველოს მართლმადიდებელი ეკლესიის იურისდიქციას აფხაზეთისა და სამხრეთ ოსეთის ტერიტორიებზე. სულ ეს არის, ილია მეორეს მეტი არაფრის გაკეთება შეუძლია.
ყველაფერი, რისი გაკეთებაც შეიძლებოდა დიპლომატიური ურთიერთობის არარსებობის პირობებში, ბიძინა ივანიშვილმა უკვე გააკეთა - ვაჭრობა, სატრანსპორტო მიმოსვლა, ტვირთების გადაზიდვა, ჰუმანიტარული კონტაქტები და სავიზო რეჟიმის შემსუბუქება.
რუსეთი ჩვენკენ მეტად ნაბიჯსაც აღარ გადმოდგამს და ყველაფერი დანარჩენი - მოსკოვში შეხვედრები, კონტაქტები, მრგვალი მაგიდები, სახალხო დიპლომატია და მსგავსი “ტუსოვკები” - ლაყბობა, ბლეფი და პირადი ბიზნესია! წაიკითხეთ პუტინის ხელმოწერილი რუსეთის საგარეო პოლიტიკის ახალი კონცეფცია - იქ ყველაფერი ნათლად წერია.
იცით, რომ მილიონობით აღფრთოვანებული რუსი ტურისტი საქართველოდან სააკაშვილის მადლიერი მიემგზავრება და არა ივანიშვილის?! და იცით, რატომ? იმიტომ, რომ საქართველოს ხელისუფლების წარმომადგენლებს ეკრძალებათ რუსი ჟურნალისტებისთვის - "აგრესორი და ოკუპანტი ქვეყნის მედიის წარმომადგენლებისათვის” - ინტერვიუს მიცემა. რუსეთთან საქართველოს სახელით საუბრის უფლება დღეს მხოლოდ აბაშიძეს აქვს... სამაგიეროდ, რუსეთის მასობრივი ინფორმაციის საშუალებებს ხალისით აძლევენ ინტერვიუს "ნაცმოძრაობის" ლიდერები და მიხეილ სააკაშვილი, რომლებიც ამბობენ, რომ ყველაფერი კარგი, რასაც რუსი ტურისტები საქართველოში ხედავენ, მათი მმართველობის დროს გაკეთდა, ბიძინა ივანიშვილის მოსვლის შემდეგ კი საქართველოში სტაგნაციამ დაისადგურა!
რა ხდება ამის შემდეგ? მონტაჟდება ტელესიუჟეტი, სადაც ჯერ გვიჩვენებენ საქართველოს ზღაპრულ სილამაზეს, ხარისხიან სერვისს, ბედნიერ ტურისტებს რუსეთიდან, რომლებსაც სტუმართმოყვრულად იღებენ მთაში თუ ზღვაზე, ჩურჩხელებით და ღვინით უმასპინძლდებიან, ამას კი მოჰყვება ინტერვიუები „ნაცმოძრაობის“ ლიდერებთან და გამყიდველ გაიძვერა ბუბა კიკაბიძესთან, რომელიც ისევ „ცვლის ფირფიტას“!
აბა, რა ქნას ბებერმა ჯამბაზმა მიმინომ, პუტინისგან „მეგობრობის ორდენის“ მიღებაზე უარი რომ თქვა და რუსების დასაბომბად მიფრინავდა?! ამისთვის მისი ბატონი სააკაშვილი „30 ვერცხლს“ უკვე აღარ გადაუხდის და ოდესაში საგასტროლოდ აღარასოდეს მიიწვევს! თუ, როგორც გასული საუკუნის 90-იან წლებში, როცა მეგობრებთან ერთად პრეზიდენტი გამსახურდია ჩამოაგდო, კალაშნიკოვით ირბინოს თბილისის ქუჩებში და ბიზნესმენები დაარეკეტოს?!
ამიტომ მშიერი ბუბა, ნანი ბრეგვაძის რჩევით, რუსი ჟურნალისტების წინაშე „ზოგადსაკაცობრიო კატეგორიებით“ მსჯელობს რუსებისა და ქართველების წარსულ მეგობრობაზე და ამით ცდილობს, საგასტროლოდ თავი მოსკოვში დააპატიჟებინოს! და ამ სატყუარას სიხარულით „ყლაპავენ“ რუსი ჟურნალისტები... ჰოდა, გამოდის, რომ როცა თბილისში ხაინდრავას „HEROკრატია“ გადის, მოსკოვში სააკაშვილის, როგორც დიდი რეფორმატორის ჰეროიზაცია დაიწყო! (ისიც საინტერესოა - როდის არის ნანი ბრეგვაძე გულწრფელი - როცა კლიპში „რუსთავი 2“-ს იცავს თუ კრემლში,როცა პუტინს „еслиженщинапросит“ უმღერის?!)
რუსმა ჟურნალისტებმა არ იციან, რომ რუსი ტურისტები საქართველოს მხოლოდ ახალი ხელისუფლების მოსვლის შემდეგ - 2012 წლიდან მოაწყდნენ, ბიძინა ივანიშვილის წყალობით, სააკაშვილის დროს კი მათ ქუჩებში აჩერებდნენ, შეურაცხყოფას აყენებდნენ, წმინდა გიორგის ბაფთებს აგლეჯდნენ და საღებავს ასხამდნენ!
რუსმა ჟურნალისტებმა არ იციან, რომ უდიდესი ნაწილი იმ კარგისა, რაც სააკაშვილის დროს გაკეთდა - აღდგენილი და აშენებული ისტორიული, კულტურული და ტურისტული ობიექტები - მეცენატი ივანიშვილის ფულით არის გაკეთებული!
რუს ჟურნალისტებს კრემლიდან მკაცრი მითითება მიეცათ - არავითარ შემთხვევაში არ შეეხონ რუსეთ-საქართველოს ურთიერთობის წარსულ ნეგატივს, ტრაგიკულ მოვლენებს  რუსეთსა და საქართველოს შორის და ყოველივე უარყოფითს, რაც ჩვენ შორის მოხდა!
მეორე მხრივ,  ვის აძლევს ხელს უდღეური სადისტისა და ნარკომანისთვის ნიჭიერი ადამიანის და რეფორმატორის იმიჯის შექმნა? იქნებ რუსებს, რომლებსაც ქართველების მსგავსად არ სიამოვნებთ გაცნობიერება, რომ პრიმიტიულმა გიჟმა, ვიგინდარამ და ლაჩარმა ამდენი პრობლემა შეუქმნა?! ან იქნებ სააკაშვილის ბიძამ - “კაგებეშნიკმა” თემურ ალასანიამ უკვე დაიწყო ჩალიჩი თავისი დეგენერატი დისშვილისათვის რუსეთის მოქალაქეობის მისაღებად, რომელსაც სულ მალე უკრაინის მოქალაქეობას ჩამოართმევენ?!
როცა მოსკოვში სააკაშვილის ამა თუ იმ დამსახურებას აღიარებენ, ამით მხოლოდ ადასტურებენ ვერსიას, რომ მიშა კრემლის კაცი და კაგებე-ს აგენტია, რომლის წყალობით რუსეთმა აფხაზეთი, სამხრეთ ოსეთი და ყირიმი მოიპოვა!
სხვათა შორის, აბა, თუ გაიხსენებთ, უკანასკნელად როდის გალანძღა სააკაშვილმა პუტინი და რუსეთი? იმდენად დიდი ხნის წინ, რომ აღარც კი მახსოვს...

“საქინფორმის“ მთავარი რედაქტორი
არნო ხიდირბეგიშვილი
2016 წლის 13 დეკემბერი                                                                          
საქართველო, თბილისი